८. कुमारिभूतवग्गवण्णना

१११९. कुमारिभूतवग्गस्स पठमे सब्बपठमा द्वे महासिक्खमानाति गब्भिनिवग्गे सब्बपठमं वुत्ता द्वे सिक्खमाना. सिक्खमाना इच्चेव वत्तब्बाति सम्मुतिकम्मादीसु एवं वत्तब्बा. गिहिगताति वा कुमारिभूताति वा न वत्तब्बाति सचे वदन्ति, कम्मं कुप्पतीति अधिप्पायो. इतो परं नवमपरियोसानं उत्तानत्थमेव.

११६३. दसमे अपुब्बसमुट्ठानसीसन्ति पठमपाराजिकसमुट्ठानादीसु तेरससु समुट्ठानेसु अननुञ्ञातसमुट्ठानं सन्धाय वुत्तं. तञ्हि इतो पुब्बे तादिसस्स समुट्ठानसीसस्स अनागतत्ता ‘‘अपुब्बसमुट्ठानसीस’’न्ति वुत्तं.

११६६. एकादसमादीनि उत्तानत्थानेव.

कुमारिभूतवग्गवण्णना निट्ठिता.