१. सञ्चिच्चसिक्खापदवण्णना

३८२. सप्पाणकवग्गस्स पठमसिक्खापदे उसुं सरं अस्सति खिपतीति इस्सासो, धनुसिप्पकुसलोति आह ‘‘धनुग्गहाचरियो’’ति. पटिसत्तुविधमनत्थं धनुं गण्हन्तीति धनुग्गहा, तेसं आचरियो धनुग्गहाचरियो. अप्पमत्तेन वत्तं कातब्बन्ति यथा ते पाणा न मरन्ति, एवं सूपट्ठितस्सतिना सेनासने वत्तं कातब्बं. सेसमेत्थ उत्तानमेव. अङ्गानिपि मनुस्सविग्गहे वुत्तनयेन वेदितब्बानीति.

सञ्चिच्चसिक्खापदवण्णना निट्ठिता.