३. सभोजनसिक्खापदवण्णना

२८०. ततिये पिट्ठसङ्घाटोति द्वारबाहायेतं अधिवचनं. खुद्दकं नाम सयनिघरं वित्थारतो पञ्चहत्थप्पमाणं होति, तस्स च मज्झिमट्ठानं पिट्ठसङ्घाटतो अड्ढतेय्यहत्थप्पमाणमेव होति, तस्मा तादिसे सयनिघरे पिट्ठसङ्घाटतो हत्थपासं विजहित्वा निसिन्नो पिट्ठिवंसं अतिक्कमित्वा निसिन्नो नाम होति. एवं निसिन्नो च मज्झं अतिक्कमित्वा निसिन्नो नाम होतीति आह ‘‘इमिना मज्झातिक्कमं दस्सेती’’ति. यथा वा तथा वा कतस्साति पिट्ठिवंसं आरोपेत्वा वा अनारोपेत्वा वा कतस्स. सचित्तकन्ति अनुपविसित्वा निसीदनचित्तेन सचित्तकं. सेसमेत्थ उत्तानमेव. परियुट्ठितरागजायम्पतिकानं सन्निहितता, सयनिघरता, दुतियस्स भिक्खुनो अभावो, अनुपखज्ज निसीदनन्ति इमानि पनेत्थ चत्तारि अङ्गानि.

सभोजनसिक्खापदवण्णना निट्ठिता.

२८४-२८९. चतुत्थपञ्चमेसु नत्थि किञ्चि वत्तब्बं.