१. अचेलकसिक्खापदवण्णना

२७३. अचेलकवग्गस्स पठमसिक्खापदे तेसन्ति तित्थियानं. तत्थाति भाजने. इतोति पत्ततो. सचे तित्थियो वदतीति ‘‘पठममेव मं सन्धाय अभिहरित्वा ठपितं मय्हं सन्तकं होति, इमस्मिं भाजने आकिरथा’’ति वदति, वट्टति. सेसमेत्थ उत्तानमेव. अञ्ञतित्थियता, अज्झोहरणीयता, अज्झोहरणत्थाय सहत्था अनिक्खित्तभाजने दानन्ति इमानि पनेत्थ तीणि अङ्गानि.

अचेलकसिक्खापदवण्णना निट्ठिता.