७. निक्कड्ढनसिक्खापदवण्णना

१२६. सत्तमे कोट्ठकानीति द्वारकोट्ठकानि. ‘‘निक्खमाति वचनं सुत्वापि अत्तनो रुचिया निक्खमति, अनापत्ती’’ति वदन्ति.

१२८. अलज्जिं निक्कड्ढतीतिआदीसु पठमं अलज्जीआदिभावेन निक्कड्ढिस्सामीति चिन्तेत्वा निक्कड्ढन्तस्स चित्तस्स लहुपरिवत्तिताय कोपे उप्पन्नेपि अनापत्ति. सेसमेत्थ उत्तानमेव. सङ्घिकविहारो, उपसम्पन्नस्स भण्डनकारकभावादिविनिमुत्तता, कोपेन निक्कड्ढनं वा निक्कड्ढापनं वाति इमानि पनेत्थ तीणि अङ्गानि.

निक्कड्ढनसिक्खापदवण्णना निट्ठिता.