५. मञ्चपीठसिक्खापदवण्णना

५२१. पञ्चमे पाळियं आसयतो, भिक्खवे, मोघपुरिसो वेदितब्बोति हीनज्झासयवसेन अयं तुच्छपुरिसोति ञातब्बो, हीनाय पच्चये लोलताय पुग्गलस्स तुच्छता ञातब्बाति अधिप्पायो. इमस्मिं सिक्खापदे, इतो परेसु च पञ्चसु अत्तना कारापितस्स पटिलाभे एव पाचित्तियं. परिभोगे पनस्स, अञ्ञेसञ्च दुक्कटमेव. पमाणातिक्कन्तमञ्चपीठता, अत्तनो करणकारापनवसेन पटिलाभोति द्वे अङ्गानि.

मञ्चपीठसिक्खापदवण्णना निट्ठिता.