१. कोसियसिक्खापदवण्णना

५४२. दुतियस्स पठमे पाळियं कोसियकारकेति कोसकारकपाणानं कोसतो निब्बत्तत्ता कोसियेन सुत्तेन वत्थादिं करोन्ते. सङ्घातन्ति विनासं.

५४४. ‘‘अवायिम’’न्ति वुत्तत्ता वायित्वा करणे अनापत्ति. मिस्सेत्वाति एळकलोमेहि मिस्सेत्वा. पटिलाभेनाति परिनिट्ठानेन ‘‘परियोसापेति, निस्सग्गिय’’न्ति (पारा. ५४५) वुत्तत्ता, कोसियमिस्सकता, अत्तनो अत्थाय सन्थतस्स करणकारापनं, पटिलाभो चाति इमानेत्थ तीणि अङ्गानि.

कोसियसिक्खापदवण्णना निट्ठिता.

५४७-५५२. दुतियञ्च ततियञ्च उत्तानमेव. तत्थ पन ओदातादिमिस्सकसञ्ञाय सुद्धकाळकानञ्ञेव सन्थतस्स करणवसेन चेत्थ द्वेभागतो अधिकेसु सुद्धकाळकेसु अनधिकसञ्ञाय सन्थतस्स करणवसेन च अचित्तकता वेदितब्बा.