७. गब्भिनिवग्गवण्णना

१. पठमादिसिक्खापदवण्णना

१०६७. ‘‘गब्भिनि’’न्ति दस्सनादीहिपि गब्भसम्भवतो वुत्तं. पदभाजनेपि पवारितभावो न दिस्सति.

१०७४. धाति वाति एत्थ दारकं सामिकानं दत्वा आहटे वड्ढेति, तथा मातापीति केचि.

१०८०. ‘‘सिक्खमान’’न्ति पाठं दीपवासिनो रोचेन्ति किरियाकिरियत्ता, जम्बुदीपवासिनो ‘‘सिक्खमाना’’ति. तस्सत्थो सिक्खाधम्ममाननतो सिक्खमानाति. इध किरिया न होति, सञ्ञाव अधिप्पेता. न एतासु असिक्खिता उपसम्पादेतब्बा उपज्झायिनीआदीनं आपत्तिभावा. ‘‘तस्सा उपसम्पदा होति एवा’’ति वदन्ति.

१०८२. धम्मकम्मेति उपसम्पदकम्मं अधिप्पेतं.

१११२. वुट्ठापितन्ति सामणेरिभूमितो याय थेरिया उपसम्पदापेक्खा वुट्ठपिता, सा थेरी वुट्ठापिता नाम, तेनेव पुन विसेसनत्थं ‘‘पवत्तिनि’’न्ति आह.

पठमादिसिक्खापदवण्णना निट्ठिता.

गब्भिनिवग्गवण्णना निट्ठिता.