४. चतुत्थपाराजिकसिक्खापदवण्णना

६७५. ‘‘लोकस्सादसङ्खातस्स मित्तसन्थवस्स वसेन तं दस्सेतुं कायसंसग्गरागेनाति वुत्त’’न्ति लिखितं. तिस्सित्थियोति तीसु इत्थीसु, तिस्सो वा इत्थियो. तं न सेवेति तासु न सेवति. अनरियाति उभतोब्यञ्जना. ब्यञ्जनस्मिन्ति अत्तनो ब्यञ्जने. न सेवेति न सेवति. न चाचरेति नाचरति. वण्णावण्णोति द्वीहिपि सुक्कविस्सट्ठि. गमनुप्पादनन्ति सञ्चरित्तं.

६७६. ‘‘निवत्थं वा पारुतं वा’’ति एत्थ निवत्थस्स वा पारुतस्स वा वत्थस्स गहणं सादियतीति अत्थो.

चतुत्थपाराजिकसिक्खापदवण्णना निट्ठिता.

पाराजिककण्डवण्णना निट्ठिता.