चूळसङ्गामवण्णना

अनुविज्जकस्सपटिपत्तिवण्णना

३६५. ठाननिसज्जवत्थादिनिस्सिताति ‘‘एवं ठातब्बं एवं निसीदितब्ब’’न्ति एवमादिका. सञ्ञाजननत्थन्ति ‘‘एवं वत्तब्ब’’न्ति एवं सञ्जाननत्थं. अनुविधियन्तेनाति चित्ते ठपेन्तेनाति अत्थो. लज्जा सा नु खोति किं सा लज्जा अयं परिसाति अधिप्पायो. अनुयोगवत्तं कथापेत्वाति ‘‘किमनुयोगवत्तं जानासी’’ति पुच्छित्वा तेनेव कथापेत्वा. अजाननप्पसङ्गा नाम अञ्ञाणं.

३६७. ‘‘भयेन भया गच्छती’’ति भयेन भयहेतु भया गच्छतीति हेतुवसेन वुत्तं. यथा ‘‘रत्तत्ता पन दुट्ठत्ता च छन्दा दोसा च गच्छती’’ति हि वुत्तं, एवं.