१. अपारसुत्तवण्णना

८१३. छन्दं निस्साय पवत्तो समाधीति कत्तुकम्यताछन्दं अधिपतिं कत्वा पटिलद्धसमाधि छन्धसमाधि. पधानसङ्खाराति चतुकिच्चसाधकस्स सम्मप्पधानवीरियस्सेतं अधिवचनं. तेहीति छन्दसमाधिपधानसङ्खारेहि. इद्धिया पादन्ति निप्फत्तिपरियायेन इज्झनट्ठेन, इज्झन्ति एताय सद्धा इद्धा वुद्धा उक्कंसगता होन्तीति इमिना वा परियायेन ‘‘इद्धी’’ति सङ्खातानं उपचारज्झानादिकुसलचित्तसम्पयुत्तानं छन्दसमाधिपधानसङ्खारानं अधिट्ठानट्ठेन पादभूतं, सेसचित्तचेतसिकरासिन्ति अत्थो. सा एव च यथावुत्तइद्धि यस्मा हेट्ठिमा हेट्ठिमा उपरिमाय उपरिमाय पादभूता, तस्मा वुत्तं ‘‘इद्धिभूतं वा पादन्ति इद्धिपाद’’न्ति. सेसेसूति वीरियसमाधिआदीसु. तत्थ हि वीरियं चित्तं वीमंसं अधिपतिं कत्वा पटिलद्धसमाधि वीमंसासमाधीति अत्थो वेदितब्बो. इधाति इमस्मिं इद्धिपादसंयुत्ते. एकपरिच्छेदोव अत्थनिद्देसो.