३. अञ्ञिन्द्रियसुत्तवण्णना

४९३. अजानितपुब्बं धम्मन्ति चतुसच्चधम्ममाह, तथा तेसंयेव ञातधम्मानन्ति. अयं पनेत्थ अत्थो – आजानातीति अञ्ञा, पठममग्गेन ञातमनतिक्कमित्वा जानातीति अत्थो. सोतापन्नादीनं छअरियानं एतं नामं. अञ्ञस्स इन्द्रियानि अञ्ञिन्द्रियानि. अञ्ञातावीसूति आजानितवन्तेसु. यस्मा अग्गफलधम्मेसु ञाणकिच्चं सातिसयं, तस्मा तं किच्चं सेसधम्मेसुपि समारोपेत्वा वुत्तं ‘‘अञ्ञातावीसु अरहत्तफलधम्मेसू’’ति. तत्थ तत्थ तेसु तेसु मग्गफलेसु. तेन तेनाकारेनाति अनञ्ञातजाननादिआकारेन.