१०. तथसुत्तवण्णना

१०९०. सभावाविजहनट्ठेनाति अत्तनो दुक्खसभावस्स कदाचिपि अपरिच्चजनेन तथसभावं. तेनाह ‘‘दुक्खञ्हि दुक्खमेव वुत्त’’न्ति. सभावस्साति दुक्खसभावस्स. अमोघतायाति अवञ्झताय. अवितथन्ति न वितथं. तेनाह ‘‘न हि दुक्खं अदुक्खं नाम होती’’ति. अञ्ञभावानुपगमेनाति समुदयादिसभावानुपगमनेन मुसा न होतीति अञ्ञो अञ्ञथा न होतीति अनञ्ञथं. तेनाह ‘‘न ही’’तिआदि.

धम्मचक्कप्पवत्तनवग्गवण्णना निट्ठिता.