४. गिलानसुत्तवण्णना

१०५०. न खो पनेतन्ति न खो एतं, नोति च अम्हेहीति अत्थोति आह ‘‘न खो अम्हेही’’तिआदि. अस्ससन्तीति अस्सासनीयाति आह ‘‘अस्सासकरेही’’ति. मरिस्सतीति मारिसो, एकन्तभाविमरणो, सो पन मरणाधीनवुत्तिकोति वुत्तं ‘‘मरणपटिबद्धो’’ति. अधिमुच्चेहीति अधिमुत्तिं उप्पादेहि. तं पन तथा चित्तस्स पणिधानं ठपनन्ति आह ‘‘ठपेही’’ति. आगमनीयगुणेसूति पुब्बभागगुणेसु. पमाणं नाम नत्थि अनन्तापरिमाणत्ता. नानाकरणं नत्थि विमुत्तिया निन्नानत्ता.