७. दुतियअविज्जापहानसुत्तवण्णना

८०. अनिच्चादिवसेन अभिनिविसनं अभिनिवेसो, सो एव धम्मसभावं अतिक्कमित्वा परतो आमसनतो परामासो, सो एव गाहो. तेन अभिनिवेसपरामासग्गाहेन गण्हितुं न युत्ता अनिच्चादिसभावत्ता. सङ्खारा एव पवत्तिया कारणभावतो सङ्खारनिमित्तानि. यो सङ्खारेसु अपरिञ्ञाताभिनिवेसेन पस्सितब्बो अत्ताकारो, सो न होतीति अञ्ञो अनत्ताकारो, ततो अञ्ञतो पस्सति. परिञ्ञाताभिनिवेसोति तीरणपरिञ्ञाय परिच्छिज्ज ञातमिच्छाभिनिवेसो. परिञ्ञाताभिनिवेसोति वा परिञ्ञातविपस्सनाभिनिवेसो. विपस्सनाति अरूपसत्तकवसेन विपस्सनाय परिजानितब्बा.

दुतियअविज्जापहानसुत्तवण्णना निट्ठिता.