१. पठमवग्गो

१. मारसुत्तवण्णना

१६०. मारसद्दोयं भावसाधनोति दस्सेन्तो ‘‘मारो वा अस्साति मरणं वा भवेय्या’’ति आह. मारेताति मरितब्बो मारं मरणं एतब्बोति आह ‘‘मारेतब्बो’’ति. अनुपादानिब्बानत्थाति फलविमुत्तिसङ्खाता अरहतो अरहन्तता नाम यावदेव अनुपादानिब्बानत्था. निब्बानब्भन्तरेति अनुपादानिब्बानाधिगमस्स अब्भन्तरे ततो ओरमेव इदं मग्गं ब्रह्मचरियं वुस्सति, न ततो परं. अस्साति ब्रह्मचरियस्स.

मारसुत्तवण्णना निट्ठिता.

२-१०. सत्तसुत्तादिवण्णना

१६१-१६९. लग्गपुच्छाति लग्गनस्स बज्झनस्स पुच्छा. यदि रूपादीसु सत्तत्ता सत्तो, खीणासवा कथं सत्ताति? सत्तभूतपुब्बाति कत्वा. कीळाविगमन्ति कीळाय अपनयनं ओरमणं. यन्तरज्जु विय भवपबन्धस्स नयनतो भवरज्जूति तण्हा वुत्ता.

सत्तसुत्तादिवण्णना निट्ठिता.

पठमवग्गवण्णना निट्ठिता.