४. परिञ्ञेय्यसुत्तवण्णना

१०६. परिञ्ञेय्येति एत्थ तिस्सो परिञ्ञा ञातपरिञ्ञा, तीरणपरिञ्ञा, पहानपरिञ्ञाति. तासु ञातपरिञ्ञा यावदेव तीरणपरिञ्ञत्था. तीरणपरिञ्ञा च यावदेव पहानपरिञ्ञत्थाति. तत्थ उक्कट्ठाय परिञ्ञाय किच्चदस्सनवसेन अत्थं दस्सेन्तो ‘‘परिञ्ञेय्येति परिजानितब्बे समतिक्कमितब्बे’’ति, पहातब्बेति अत्थो. तेनाह भगवा – ‘‘कतमा च, भिक्खवे, परिञ्ञा? रागक्खयो, दोसक्खयो, मोहक्खयो’’ति, तस्मा समतिक्कमन्ति, समतिक्कन्तं पहानस्स उपायं. समतिक्कमित्वा ठितन्ति पजहित्वा ठितन्ति अयमेत्थ अत्थो.

परिञ्ञेय्यसुत्तवण्णना निट्ठिता.