१२. परंमरणसुत्तवण्णना

१५५. यथा अतीतकप्पे अतीतासु जातीसु कम्मकिलेसवसेन आगतो, तथा एतरहिपि आगतोति तथागतो, यथा यथा वा पन कम्मं कतूपचितं, तथा तं तं अत्तभावं आगतो उपगतो उपपन्नोति तथागतो, सत्तोति आह ‘‘तथागतोति सत्तो’’ति. एतन्ति ‘‘एवं होति भवति तिट्ठति सस्सतिसम’’न्ति एवं पवत्तं दिट्ठिगतं. अत्थसन्निस्सितं न होतीति दिट्ठधम्मिकसम्परायिकपरमत्थतो सुखन्ति पसत्थसन्निस्सितं न होति. आदिब्रह्मचरियकन्ति एत्थ मग्गब्रह्मचरियं अधिप्पेतं तस्स पधानभावतो. तस्स पन एतं दिट्ठिगतं आदिपटिपदामत्तं न होति अनुपकारकत्ता विलोमनतो च. ततो एव इतरब्रह्मचरियस्सपि अनिस्सयोव. सेसं वुत्तनयेन वेदितब्बं.

परंमरणसुत्तवण्णना निट्ठिता.