७. नागदत्तसुत्तवण्णना

२२७. अतिकालेनाति अतिविय पुब्बण्हकालेन, कालस्सेवाति अत्थो. कोटिसम्मुञ्जनियाति सम्मुञ्जनिकोटिया, सम्मुञ्जनिया एकदेसेनेवाति अत्थो. इमिना सम्मज्जने अमनापकारितं दस्सेति. मज्झन्हिके वीतिवत्तेति गिहिसंसग्गवसेन कालं वीतिनामेन्तो मज्झन्हे बहुवीतिवत्ते. अञ्ञेहि भिक्खूहीति नातिकालं पविट्ठेहि. निस्सक्कवचनञ्चेतं. भायामि नागदत्तन्ति तस्स पटिपत्तिं भायितब्बं कत्वा देवता वदन्ती पटिपत्तियं नियोजेति. सुप्पगब्भन्ति कायपागब्बियादीहि अतिविय समन्नागतं.

नागदत्तसुत्तवण्णना निट्ठिता.