७. वनकम्मिकसुत्तवण्णना

२०३. वनकम्मे नियुत्तो, किरियमानेन वनकम्मं एतस्स अत्थीति वनकम्मिको. इमस्मिं वनसण्डेति इमस्मिं एवंमहन्ते वनसण्डे. न मे वनस्मिं करणीयमत्थि यथा, ‘‘ब्राह्मण, तुय्ह’’न्ति अधिप्पायो. इतरं पन यं महाकिलेसवनं, तं मग्गञाणफरसुना समाधिमयसिलायं सुनिसितेन सब्बसो उच्छिन्नमूलं, ततो एव निब्बनथो निक्किलेसगहनो. विवेकाभिरतिया एकको अभिरतो पटिपक्खविगमेन. तेनाह ‘‘अरतिं…पे… जहित्वा’’ति.

वनकम्मिकसुत्तवण्णना निट्ठिता.