१. सनङ्कुमारसुत्तवण्णना

१८२. पोराणकत्ताति निब्बत्तित्वा चिरकालत्ता. जातत्ता जनो, तं इतो जनेतो, तस्मिं. खत्तियो सेट्ठो लोकमरियादपरिपालनादिना सम्मापटिपत्तियं सत्तानं नियोजनेन बहुकारत्ता. सो हि परे तथा पटिपादेन्तो सयम्पि तत्थ पतिट्ठितोयेव होतीति सेट्ठो वुत्तो. पटिपक्खविज्झनट्ठेन पुब्बेनिवासादीनं विदितकरणट्ठेन विज्जाति. सद्धाहिरोत्तप्पबाहुसच्चवीरियसतिपञ्ञाति इमे सत्त सद्धम्मा. चरन्ति अगतपुब्बं दिसं एतेहीति चरणानि, सीलादयो पन्नरस धम्मा.

सनङ्कुमारसुत्तवण्णना निट्ठिता.