८. मल्लिकासुत्तवण्णना

११९. ‘‘कस्मा पुच्छती’’ति? पुच्छाकारणं चोदेत्वा समुदयतो पट्ठाय दस्सेतुं ‘‘अयं किर मल्लिका’’तिआदि वुत्तं. मालारामं गन्त्वाति अत्तनो पितु मालारामं रक्खणत्थञ्चेव अवसेसपुप्फग्गहणत्थञ्च गन्त्वा. कासिगामेति कासिरट्ठस्स गामे. सो किर गामो महाकोसलराजेन अत्तनो धीतुया पतिघरं गच्छन्तिया पुप्फमूलत्थाय दिन्नो, तंनिमित्तं. भागिनेय्येन अजातसत्तुना. तस्साति रञ्ञो पसेनदिस्स. साति मल्लिका. निवत्तितुन्ति तस्सा धम्मताय निवत्तितुं तस्सा वचनं पटिक्खिपितुं. नेवज्झगाति वत्तमानत्थे अतीतवचनन्ति आह ‘‘नाधिगच्छती’’ति. पुथु अत्ताति तेसं सत्तानं अत्ता.

मल्लिकासुत्तवण्णना निट्ठिता.