५. अत्तरक्खितसुत्तवण्णना

११६. पीदहनन्ति संयमनं. कम्मपथभेदं अप्पत्तस्साति सुपिनकालो विय पवत्तिमत्तताय कम्मपथविसेसं अगतस्स. कम्मस्साति अकुसलकम्मस्स. संवरन्ति संवरभावं दस्सेति, इतरस्स पन संवरभावो पुरिमेहि तीहि पदेहि दस्सितोवाति. ओत्तप्पम्पि गहितमेव तदविनाभावतो. न हि पापजिगुच्छनं पापउत्रासरहितं, उत्रासो वा पापजिगुच्छनरहितो अत्थीति.

अत्तरक्खितसुत्तवण्णना निट्ठिता.