२. दुतियकस्सपसुत्तवण्णना

८३. द्वीहि झानेहीति आरम्मणलक्खणूपनिज्झानलक्खणेहि द्वीहि झानेहि. कम्मट्ठानविमुत्तियाति कम्मट्ठानानुयोगलद्धाय विमुत्तिया. तेन तदङ्गविक्खम्भनविमुत्तियो वदति. सत्थुसासनस्स हदयत्ता अब्भन्तरत्ता हदयस्स मानसस्स, अनुपत्तिं पटिलाभमानसं. तं पन अत्थतो अञ्ञा एवाति आह ‘‘अरहत्त’’न्ति. तं पत्तुकामेन एकन्ततो वज्जेतब्बतण्हादिट्ठीनं भावे तस्स अनिज्झनतो, तदभावे इज्झनतो च ते उप्पादनवसेन यदग्गेन निस्सितो, तदग्गेन पनायम्पि तेहि निस्सितो नाम होतीति आह ‘‘अनिस्सितो’’तिआदि. अरहत्तं आनिसंसितब्बट्ठेन आनिसंसं एतस्साति अरहत्तानिसंसो. अरहत्तं पत्तुकामस्स पुब्बभागपटिपदा इच्छितब्बा. तत्थ च सब्बपठमो कम्मट्ठानअत्तानुयोगो, सो इध न गहितोति आह ‘‘तन्तिधम्मो पुब्बभागो’’ति. तत्थ तन्तिधम्मोति परियत्तिधम्मो.

दुतियकस्सपसुत्तवण्णना निट्ठिता.