७. बुद्धवन्दनासुत्तवण्णना

२६३. उट्ठहाति उट्ठानं कायिकवीरियं करोहि. तेनाह ‘‘विचर, लोके’’ति. चेतसिकवीरियं पन भगवता मत्थकं पापितमेव. तेनाह ‘‘विजितसङ्गामा’’ति. द्वादसयोजनिकस्स उच्चभावेन. वित्थारतो पन आयामतो च अनेकयोजनसतसहस्सपरिमाणचक्कवाळं अतिब्यापेत्वा ठितस्स. पन्नभाराति पातितभार. निक्खेपितब्बतो भाराति आह ‘‘ओरोपितखन्धा’’तिआदि. ते हि तंसमङ्गिनो पुग्गलस्स सम्पातनट्ठेन भारा नाम. वुत्तञ्हेतं ‘‘भारा हवे पञ्चक्खन्धा’’ति (सं. नि. ३.२२). तदेकदेसा च किलेसाभिसङ्खारा. पन्नरसाय पुण्णमाय रत्तिन्ति यथा पन्नरसपुण्णमाय रत्तियं परिपुण्णकाले उपक्किलेसविमुत्तो चन्दो सोभति, एवं तव चित्तं सब्बसो उपक्किलेसविमुत्तं सोभतीति अधिप्पायो.

बुद्धवन्दनासुत्तवण्णना निट्ठिता.