४. मणिभद्दसुत्तवण्णना

२३८. सुखं पटिलभतीति दिट्ठधम्मिकादिभेदं सुखं अधिगच्छति. निच्चमेव सेय्यो सतिमतो आयतिं हितचरणतो. मणिभद्दो ‘‘सतिमापुग्गलो सतोकारी सम्पति वेरं नप्पसवती’’ति अधिप्पायेन ‘‘वेरा च परिमुच्चती’’ति आह. भगवा पन सतिमन्ततासिद्धिया वेरपरिमुच्चनं न अच्चन्तिकं, नापि एकन्तिकं पटिपक्खेन परतो च अप्पहीनत्ताति तं निसेधेन्तो ‘‘वेरा च न परिमुच्चती’’ति वत्वा, यं अच्चन्तिकं एकन्तिकञ्च परस्स वसेन वेरपरिमुच्चनं, तं दस्सेन्तो ‘‘यस्सा’’ति गाथमाह. करुणायाति अप्पनाप्पत्ताय करुणाय. करुणापुब्बभागेति करुणाभावनाय वसेन उप्पादितपठमज्झानूपचारे. सोति करुणाभावनं भावेन्तो पुग्गलो. मेत्तंसोति मेत्तचित्तं अंसो एको कुसलकोट्ठासो एतस्साति मेत्तंसो. तस्स केनचीति तस्स अरहतो करुणाय मेत्ताभावनाय च सातिसयत्ता तदभावेन केनचि पुग्गलेन सद्धिं वेरप्पसङ्गो नाम नत्थि. इमिना खीणासवेपि मेत्ताकरुणाभावनारहिते कोचि अत्तनो चित्तदोसेन वेरं करेय्य, न पन तस्मिं मेत्ताकरुणाचेतोविमुत्तिसमन्नागते कोचि वेरं करेय्य. एवं महिद्धिका ब्रह्मविहारभावनाति दस्सेति.

मणिभद्दसुत्तवण्णना निट्ठिता.