७. सरसुत्तवण्णना

२७. सरणतो अविच्छेदवसेन पवत्तनतो खन्धादीनं पटिपाटि सरा. तेनाह ‘‘इमे संसारसरा’’ति. कुतोति केन कारणेन, किम्हि वा? तेनाह ‘‘किं आगम्मा’’ति? न पतिट्ठाति पच्चयाभावतो. आपोतिआदिना पाळियं चतुन्नं महाभूतानं अप्पतिट्ठानापदेसेन तत्थ कामरूपभवानं अभावो दस्सितो. तदुभयाभावदस्सनेन हेट्ठा वुत्तनयेनेव अरूपभवस्सपि अभावो दस्सितोव होति, यथारुतवसेन वा एत्थ अत्थो वेदितब्बो. यस्मा पुरिमा द्वे गहिता, गहितञ्च अत्थं परिग्गहेत्वाव पच्छिमत्थो पवत्तोति.

सरसुत्तवण्णना निट्ठिता.