२३०. सङ्घे भिन्ने चीवरुप्पादकथा

३७६. सङ्घो भिज्जतीति एत्थ द्विकोट्ठासवसेन भिज्जनमेवाधिप्पेतं, न अञ्ञन्ति आह ‘‘द्वे कोट्ठासा’’ति. एकस्मिं पक्खे चीवरानि देन्तीति योजना. द्विपक्खं सन्धाय ‘‘सकलस्स सङ्घस्सा’’ति वुत्तं. एतन्ति चीवरं. तस्सेव चीवरन्ति तस्स कोट्ठासस्स चीवरमेव. यत्थाति यस्मिं देसे. दक्खिणोदकं पमाणन्ति दक्खिणोदकमेव पमाणं, न देय्यधम्मो. तस्मा दक्खिणोदकं पटिग्गण्हन्ता, देय्यधम्मस्स सामिनो होन्तीति अधिप्पायो. उभोहिपि पक्खेहीति योजना. परसमुद्देति जम्बुदीपे. सो हि सीहळदीपतो समुद्दस्स पारत्ता परसमुद्दोति वुच्चति. इतरो पक्खोति दक्खिणोदकस्स च चीवरस्स च लद्धपक्खतो इतरो अलद्धो पक्खो.