२०५. राजगहसेट्ठिवत्थुकथा

३३२. इरियापथसम्परिवत्तनेनाति इरियापथस्स पुनप्पुनं परिवत्तनेन. तीहि सत्ताहेहि निच्चलस्स निपन्नस्स अस्स सेट्ठिस्स मत्थलुङ्गन्ति योजना. अप्पेव निपज्जेय्याति योजना. नन्ति सेट्ठिं. तेनेवाति तेनेव कारणेन. सीसं छादेतीति सीसच्छवीति वुत्ते सीसपटिच्छादनचम्मन्ति आह ‘‘सीसचम्म’’न्ति. तस्साति सेट्ठिस्स. तीहि सत्ताहेनाति एत्थ पुब्बपदेन पच्छिमपदं गुणित्वा गहेतब्बन्ति आह ‘‘तीहि पस्सेहि एकेनेकेन सत्ताहेना’’ति.

३३३. जनं नीहरापेत्वाति जनं अपक्कमापेत्वा.