१४३. वत्थुट्ठपनादिकथा

२३९. चोरा अगमंसु किराति सम्बन्धो. पोक्खरणितो नीहरित्वाति सम्बन्धो. सोति भिक्खु, एवमाहाति सम्बन्धो. वुत्थेनाति वसन्तेन, येन केनचि कतन्ति सम्बन्धो. तं पुग्गलन्ति वत्थुकतं तं पुग्गलं. एत्थाति ‘‘वत्थुं ठपेत्वा सङ्घो पवारेय्या’’ति पाठे. इमिना वत्थुना अपदिसाहीति सम्बन्धो. नन्ति पुग्गलं. अनुविज्जित्वाति अनुयुञ्जित्वा, पुच्छित्वाति अत्थो.

एको भिक्खु पूजेसि, पिवीति सम्बन्धो. तस्साति भिक्खुस्स. तदनुरूपोति तेसं पूजनपिवनानं अनुरूपो. सोति चोदको भिक्खु. तं गन्धन्ति तं सरीरगन्धं. यं पुग्गलन्ति योजना. ठपेसीति पवारणाय ठपेसि. अयमस्साति अयं दोसो अस्स पुग्गलस्स.

इदानेव नन्ति एत्थ ‘‘न’’न्ति पदं ‘‘पुग्गल’’न्ति पदेन योजेतब्बं. नं पुग्गलन्ति हि अत्थो. उभयन्ति वत्थुञ्च पुग्गलञ्चाति उभयं. कल्लं वचनायाति युत्तं कथेतुं. कस्मा कल्लं वचनायाति योजना. पवारणतो पुब्बे, पच्छा चाति सम्बन्धो. इति तस्मा कल्लं वचनायाति योजना. इदञ्हि उभयन्ति वत्थुपुग्गलसङ्खातं इदमेव उभयं. पवारणाय पुब्बेति योजना. उक्कोटेन्तस्साति चालेन्तस्स.