१०८. वस्सानेचारिकापटिक्खेपादिकथा

१८५. आपत्ति वेदितब्बाति अनपेक्खगमनेन उपचारातिक्कमे सापेक्खगमनेन अञ्ञत्थ अरुणुट्ठापने आपत्ति वेदितब्बा. विहारगणनाय आपत्तियो वेदितब्बाति एत्थ वस्सूपनायिकदिवसे वस्सं अनुपगन्तुकामताचित्तेन विहारं अतिक्कमेय्य, विहारगणनाय आपत्तियो वेदितब्बा. तमेवत्थं वित्थारेन्तो आह ‘‘सचे ही’’तिआदि. तं दिवसन्ति तस्मिं वस्सूपगमनदिवसे. सतं आपत्तियोति एत्थ सतन्ति सङ्ख्यापधानत्ता एकवचनन्ति सद्दसत्थेसु वुत्तं. एका एव आपत्तीति अत्तनो विहारस्स अतिक्कमनेयेव एका एव आपत्ति. केनचि अन्तरायेन अनुपगतेनाति सम्बन्धो.

वस्सनामो इमस्सत्थीति वस्सोति वचनत्थं दस्सेन्तो आह ‘‘वस्सनामक’’न्ति. ‘‘पठमं मास’’न्ति इमिना अञ्ञपदस्स सरूपं दस्सेति. पठमं मासन्ति चतूसु वस्समासेसु पठमं मासं. उक्कड्ढितुकामोति उपरि कड्ढितुकामो. आसळ्हीमासमेव, न सावणमासन्ति अत्थो. जुण्हसद्दो चन्दपभायुत्तो मासोति आह ‘‘मासे’’ति. चन्दपभायुत्तो मासोति आह ‘‘मासे’’ति. चन्दपभायुत्तो हि मासो जोतति दिप्पतीति जुण्होति वुच्चति. तस्मा ‘‘मासे’’ति सामञ्ञतो वुत्तेपि पुण्णमियुत्तो मासोव गहेतब्बो. काचि परिहानि नामाति किञ्चि सीलादीनं हायनं नाम. अञ्ञस्मिम्पीति वस्सूपगमनतो अञ्ञस्मिम्पि. धम्मिकेति धम्मेन युत्ते.