६३. उपसम्पदाविधिकथा

१२६. तं उपज्झन्ति तं उपज्झायं. ‘‘उपज्झा’’ति च ‘‘उपज्झायो’’ति च हि अत्थतो एकं, ब्यञ्जनमेव नानं यथा ‘‘सभा सभाय’’न्ति. एत्थ उपज्झासद्दो राजादिगणो (रुपसिद्धि ५९९ सुत्ते; सद्दनीति ११४० सुत्ते), उपज्झायसद्दो पुरिसादिगणो. सभासद्दो इत्थिलिङ्गो, सभायसद्दो पुल्लिङ्गो वा नपुंसकलिङ्गो वा. ‘‘वित्थायन्ती’’ति सद्दो नामधातूति आह ‘‘वित्थद्धगत्ता होन्ती’’ति. वित्थसद्दो हि दब्बवाचकत्ता नामसद्दो, विकारेन थद्धो गत्तो एतेसन्ति वित्था, द्धकारस्स लोपं कत्वा, ततो आयपच्चयो होति. यन्ति यं अन्तरायजातं. तव सरीरेति तुय्हं काये. ‘‘निब्बत्त’’न्ति इमिना ‘‘जात’’न्ति एत्थ जनधातुया जननत्थं दस्सेति, ‘‘विज्जमान’’न्ति इमिना जनीधातुया पातुभावत्थं दस्सेति. सन्तन्ति संविज्जमानं. इतिआदि कथेतब्बन्ति योजना.