५८. अलज्जीनिस्सयवत्थुकथा

१२०. ‘‘अलज्जीनं ओवाद’’न्ति पाठसेसेन योजिते साम्यत्थे सामिवचनम्पि युज्जतेव. तं नयं अदस्सेत्वा ‘‘उपयोगत्थे सामिवचन’’न्ति वुत्तं. ‘‘भिक्खूहि सभागत’’न्ति इमिना भिक्खूहि समानो सीलादिगुणसङ्खातो भागो इमस्साति भिक्खुसभागो, तस्स भावो भिक्खुसभागतन्ति वचनत्थं दस्सेति. ‘‘लज्जिभाव’’न्ति इमिना भावपच्चयस्स सरूपं दस्सेति. नवट्ठानन्ति अभिनवट्ठानं. गतेन भिक्खुनाति सम्बन्धो.

थेरोति निस्सयदायको थेरो. गहेतुकामोति निस्सयं गहेतुकामो. आचारन्ति निस्सयपटिपन्नस्स आचारं. तदहेवाति तस्मिं गतअहनि एव. आभोगस्स कतत्ता, अरुणुग्गमनस्स च अजाननत्ता वुत्तं ‘‘अनापत्ती’’ति. अरुणुग्गमनं अजानन्तोपि आभोगस्स अकतत्ता वुत्तं ‘‘अरुणुग्गमने दुक्कट’’न्ति. ‘‘द्वे तीणि दिवसानी’’ति पदेन चतु पञ्च छ दिवसानिपि गहेतब्बानि लक्खणहारनयेन अनिस्सितेन वसितब्बभावेन समानफलत्ता. तेनाह ‘‘सत्ताहं वसिस्सामी’’ति. लद्धपरिहारोति लद्धो परिहारो आपत्तिअपनयनं येनाति लद्धपरिहारो.