४८. तित्थियपक्कन्तककथा

११०. पक्कमतीति पक्कन्तो, ‘‘पविट्ठो’’ति इमिना कमुधातुया पदविक्खेपत्थं दस्सेति, इच्छाकन्तिअत्थे निवत्तेति. सोति तित्थियपक्कन्तको. तत्राति तित्थियपक्कन्तके. उपसम्पन्नो भिक्खु गच्छतीति सम्बन्धो. तेसन्ति तित्थियानं. ‘‘तित्थियो भविस्सामी’’ति पुब्बेव लद्धिगहितत्ता वुत्तं ‘‘लिङ्गे आदिन्नमत्ते’’ति. कुसचीरादीनीति एत्थ कुसो वुच्चति सलाका. चीरोति पन्ति, आवलीति अत्थो. कुसे रज्जुना आवुनित्वा कतो चीरो कुसचीरो, सो आदि येसं तानीति कुसचीरादीनि. आदिसद्देन फलकचीरादयो सङ्गण्हाति. कुसतिणेहि कतो चीरो कुसचीरोतिपि वदन्ति. नग्गोति अचेलको. आजीवकोति अचेलकवतमादाय जीवतीति आजीवको. तेसन्ति आजीवकानं. ओवदितो हुत्वाति सम्बन्धो.

किन्ति किं वतं. लुञ्चापेतीति अपनयापेति. मोरपिञ्छादीनीति एत्थ पिञ्छं वुच्चति पक्खो. सो हि पिञ्छति आकासे गच्छति अनेनाति पिञ्छन्ति वुच्चति. पिछि गतियन्ति धातुपाठो. मोरस्स पिञ्छं मोरपिञ्छं, तं आदि येसं तानीति मोरपिञ्छादीनि. आदिसद्देन उलूकपिञ्छादयो सङ्गण्हाति. याव न सम्पटिच्छतीति याव लद्धिं न सम्पटिच्छति. नन्ति वीमंसमानं भिक्खुं. लद्धीति तित्थियलद्धि. रक्खतीति तित्थियपक्कन्तकतो रक्खति. लद्धिया अभावेन तित्थियपक्कन्तको न होतीति अधिप्पायो. अच्छिद्दचीवरोति एत्थ आकारो कोधत्थो, अड्डत्थो वा होति, छिद्दसद्दो दूसनत्थो होति. तस्मा आकोधेन अड्डेन वा छिद्दो दूसितोति अच्छिद्दोति अत्थो दट्ठब्बो. ‘‘अच्छिन्नो’’तिपि पाठो. अच्छिद्दं चीवरमेतस्साति अच्छिद्दचीवरो. तित्थायतनन्ति तित्थीनं निवासट्ठानं, तित्थियानं उपस्सयन्ति अत्थो.