४२. सिक्खापददण्डकम्मवत्थुकथा

१०६. नासनवत्थूति लिङ्गनासनाय अधिट्ठानं, कारणन्ति वुत्तं होति. पच्छिमानं पञ्चन्नन्ति योजना. दण्डकम्मवत्थूति दण्डकम्मस्स कारणं.

१०७. अप्पतिस्साति एत्थ भिक्खूनं वचनस्स पटिमुखं आदरेन असवनं भिक्खू जेट्ठकट्ठाने न ठपेन्ति नामाति दस्सेन्तो आह ‘‘भिक्खू जेट्ठकट्ठाने’’तिआदि. ‘‘समानजीविका’’ति इमिना असभागवुत्तिकाति एत्थ सभागसद्दो समानसद्दपरियायो, वुत्तिसद्दो जीविकपरियायोति दस्सेति. परिसक्कतीति एत्थ सक्क गतियन्तिधातुपाठेसु (सद्दनीतिधातुमालायं १६ ळकारन्तधातु) वुत्तत्ता परिपुब्बो सक्कसद्दो गत्यत्थोति आह ‘‘परक्कमती’’ति. किन्तीति किमेव. इतिसद्दो हेत्थ एवसद्दत्थो, केन एव उपायेनाति हि अत्थो. अक्कोसति चेवाति जातिआदीहि अक्कोसति चेव. भेदेतीति भेदापेति. आवरणं कातुन्ति एत्थ आवरणसद्दो निवारणसद्दवेवचनोति आह ‘‘निवारणं कातु’’न्ति. यत्थाति यस्मिं परिवेणे, सेनासने वा. वस्सग्गेनाति वस्सगणनाय. (तस्साति परिवेणसेनासनस्स. उपचारेति आसन्ने). मुखद्वारिकन्ति मुखसङ्खातेन द्वारेन अज्झोहरितब्बं. ‘‘वदतोपी’’ति इमिना वचीपयोगेन दुक्कटापत्तिं दस्सेति, ‘‘निक्खिपतोपी’’ति इमिना कायपयोगेन. अनाचारस्साति दण्डकम्मे अनाचारस्स. एत्तके नाम दण्डकम्मेति एत्तके नाम उदकाहरापनादिसङ्खाते दण्डकम्मे. इदन्ति यागुभत्तादिं. लच्छसीति लभिस्ससि. ‘‘एत्तके नाम दण्डकम्मे’’ति वुत्तवचनस्स युत्तिं दस्सेन्तो आह ‘‘भगवता ही’’तिआदि. दण्डकम्मन्ति दण्डेन्ति दमेन्ति एतेनाति दण्डो, सोयेव कत्तब्बत्ता कम्मन्ति दण्डकम्मं आवरणादि. अपराधानुरूपन्ति वीतिक्कमस्स अपराधस्स अनुरूपं. तम्पीति उदकदारुवालिकादिआहरापणम्पि. तञ्च खोति तञ्च करणं. ओरमिस्सतीति कायेन ओरमिस्सति. विरमिस्सतीति वाचाय विरमिस्सति. उण्हपासाणे वातिआदीसु वासद्देन अञ्ञानिपि अत्ततापनपरितापनादीनि कम्मानि सङ्गण्हाति.