४. तुवट्टवग्गो

१. पठमसिक्खापद-अत्थयोजना

९३३. तुवट्टवग्गस्स पठमे ‘‘तुवट्ट निपज्जाय’’न्ति धातुपाठेसु (सद्दनीतिधातुमालायं १८ टकारन्तधातु) वुत्तत्ता ‘‘तुवट्टेय्युन्ति निपज्जेय्यु’’न्ति वुत्तन्ति. पठमं.

२. दुतियसिक्खापदं

९३७. दुतिये एकत्थरणपावुरणन्तिएत्थ उत्तरपदानं द्वन्दभावं, पुब्बपदेन च बाहिरत्थसमासभावं दस्सेतुं वुत्तं ‘‘एक’’न्तिआदि. तत्थ चेव, चसद्देहि द्वन्दभावं दीपेति, ‘‘एतास’’न्तिइमिना बाहिरत्थसमासभावं. एतन्ति ‘‘एकत्थरणपावुरणा’’ति एतं नामन्ति. दुतियं.

३. ततियसिक्खापदं

९४१. ततिये उळारकुलाति जातिसेट्ठकुला, इस्सरियभोगादीहि वा विपुलकुला. गुणेहीति सीलादिगुणेहि. ‘‘उळाराति सम्भाविता’’ति इमिना इतिलोपतुल्याधिकरणसमासं दस्सेति.

‘‘अभिभूता’’ति इमिना ‘‘अपकता’’ति एत्थ करधातु सब्बधात्वत्थवाचीपि इध अपपुब्बत्ता विसेसतो अभिभवनत्थे वत्ततीति दस्सेति. एतासन्ति भिक्खुनीनं. ‘‘सञ्ञापयमाना’’ति इमिना सञ्ञापनं सञ्ञत्तीति वचनत्थं दस्सेति. हेतूदाहरणादीहीति एत्थ आदिसद्देन उपमादयो सङ्गण्हाति. ‘‘विविधेहि नयेहि ञापना’’ति इमिना विविधेहि ञापनं विञ्ञत्तीति वचनत्थं दस्सेति.

९४३. चङ्कमने पदवारगणनाय आपत्तिया न कारेतब्बोति आह ‘‘निवत्तनगणनाया’’ति. पदादिगणनायाति पदअनुपदादिगणनायाति. ततियं.

४. चतुत्थसिक्खापदं

९४९. चतुत्थे अनुत्तानट्ठानं नत्थीति. चतुत्थं.

५. पञ्चमसिक्खापदं

९५२. पञ्चमे आणत्ता भिक्खुनीति योजना. इदञ्च पच्चासन्नवसेन वुत्तं यंकिञ्चिपि आणापेतुं सक्कुणेय्यत्ताति. पञ्चमं.

६-९. छट्ठादिसिक्खापदं

९५५. छट्ठ-सत्तम-अट्ठम-नवमेसु अनुत्तानवचनं नत्थीति. छट्ठ सत्तम अट्ठम नवमानि.

१०. दसमसिक्खापदं

९७३. दसमे अहुन्दरिकाति तस्मिं काले, देसे वा सम्बाधस्स नाममेतन्ति आह ‘‘अहुन्दरिकाति सम्बाधा’’ति.

९७५. यथा ‘‘उत्तरिछप्पञ्चवाचाही’’ति (पाचि. ६२-६५) एत्थ पञ्चसद्दो न कोचि अत्थो, वाचासिलिट्ठत्थं लोकवोहारवसेन वुत्तो, न एवमिध, इध पन अत्थो अत्थि, पञ्च योजनानि गच्छन्तियापि अनापत्तियेवाति आह ‘‘पवारेत्वा…पे… अनापत्ती’’ति. पच्चागच्छतीति पटिनिवत्तेत्वा आगच्छतीति. दसमं.

तुवट्टवग्गो चतुत्थो.