८. अट्ठमसिक्खापदं

९१६. अट्ठमे ये नाटकं नाटेन्ति, ते नटा नामाति योजना. इमिना नटकं नाटेन्तीति नटाति वचनत्थं दस्सेति. ये नच्चन्ति, ते नाटका नामाति योजना. इमिना सयं नटन्तीति नाटकाति वचनत्थं दीपेति. वंसवरत्तादीसूति एत्थ वंसो नाम वेणु. वरत्ता नाम नद्धिका. आदिसद्देन रज्जुआदयो सङ्गण्हाति. ये लङ्घनकम्मं करोन्ति, ते लङ्घका नामाति योजना. मायाकाराति एत्थ माया नाम मयनामकेन असुरेन सुरे चलयितुं कतत्ता मयस्स एसाति माया, तं करोतीति मायाकारो, मयनामको असुरोयेव. अञ्ञे पन रूळ्हीवसेन ‘‘मायाकारा’’ति वुच्चन्ति. सोकेन झायनं डय्हनं सोकज्झायं, सुरानं सोकज्झायं करोतीति सोकज्झायिको, मयनामको असुरोयेव. अञ्ञे पन रूळ्हीवसेन ‘‘सोकज्झायिका’’ति वुच्चन्ति. इति इममत्थं दस्सेतुं वुत्तं ‘‘सोकज्झायिका नाम मायाकारा’’ति. कुम्भथुणिका नामाति एत्थ विस्सट्ठत्ता थवीयतीति थुणो, सद्दो. कुम्भस्स थुणो कुम्भथुणो. तेन कीळन्तीति कुम्भथुणिका, इति इममत्थं दस्सेति ‘‘घटकेन कीळनका’’ति इमिना. बिम्बिसकन्ति चतुरस्सअम्बणताळनं, तं वादेन्तीति बिम्बिसकवादकाति. अट्ठमं.