४९. चतुरारक्खनिद्देसो

चतुरक्खाति –

४६१. बुद्धानुस्सति मेत्ता च, असुभं मरणस्सति;

आरकत्तादिनारहं, सम्मा सामञ्च बुद्धतो.

४६२. सम्मासम्बुद्धइति वानुस्सति या पुनप्पुनं;

नवभेदे भगवतो, बुद्धानुस्सति सा गुणे.

४६३. सीमट्ठसङ्घे सीमट्ठदेवतासु च इस्सरे;

जने गोचरगामम्हि, तत्थुपादाय मानुसे.

४६४. सब्बसत्तेसु सुखिता, होन्तावेरातिआदिना;

परिच्छिज्ज परिच्छिज्ज, भावना मेत्तभावना.

४६५. वण्णसण्ठानओकास-दिसतो परिच्छेदतो;

ववत्थपेत्वा केसादि-कोट्ठासे अनुपुब्बतो.

४६६. नातिसीघञ्च सणिकं, विक्खेपं पटिबाहयं;

पण्णत्तिं समतिक्कम्म, मुञ्चन्तस्सानुपुब्बतो.

४६७. वण्णआसयसण्ठान-गन्धोकासेहि भावना;

पटिक्कूलाति कोट्ठासे, उद्धुमातादिवत्थुसु;

गहेत्वा असुभाकारं, पवत्ता भावनासुभं.

४६८. ‘‘मरणं मे भविस्सति, जीवितं उच्छिज्जिस्सति;

मरणं मरणं वा’’ति, भावयित्वान योनिसो.

४६९. वधकस्सेवुपट्ठाना, सम्पत्तीनं विपत्तितो;

उपसंहरतो कायबहुसाधारणा तथा.

४७०. आयुदुब्बलतो कालववत्थानस्सभावतो;

अद्धानस्स परिच्छेदा, भावना मरणस्सतीति.