४४. उपोसथनिद्देसो

उपोसथोति –

४१०. दुवे उपोसथा चातु-द्दसो पन्नरसो इति;

सुत्तुद्देसमधिट्ठान-पारिसुद्धिवसा तयो.

४११. सुत्तुद्देसोव सङ्घस्स, अधिट्ठानउपोसथो;

पुग्गलस्सेव सेसानं, पारिसुद्धिउपोसथो.

४१२. पुब्बकिच्चे च करणे, पत्तकल्ले समानिते;

सुत्तं उद्दिसति सङ्घो, पञ्चधा सो विभावितो.

४१३. विनान्तरायं सङ्खेपे-नुद्देसो विनिवारितो;

‘‘थेरोव इस्सरो द्वीसु, उद्देसेस्वेत्थ तीसु वा;

विसदेसू’’ति वुत्तत्ता, अवत्तन्तेपि वट्टति.

४१४. आगच्छेय्युं यदि समा, उद्दिसन्ते व थोकिका;

उद्दिट्ठं यं सुउद्दिट्ठं, सोतब्बमवसेसकं.

४१५. उद्दिट्ठमत्ते सकला-येकच्चायुट्ठिताय वा;

पारिसुद्धिं करेय्येसं, सन्तिके बहुकाथ चे;

कत्वा सब्बविकप्पेसु, पुब्बकिच्चं पुनुद्दिसे.

४१६. पन्नरसोवासिकानं, इतरानं सचेतरो;

समानेतरेनुवत्तन्तु, पुरिमानं सचेधिका;

पुरिमा अनुवत्तन्तु, तेसं सेसेप्ययं नयो.

४१७. पाटिपदोवासिकानं, इतरानं उपोसथो;

समथोकानं सामग्गिं, मूलट्ठा देन्तु कामतो.

४१८. बहि गन्त्वान कातब्बो, नो चे देन्ति उपोसथो;

देय्यानिच्छाय सामग्गी, बहूसु बहि वा वजे.

४१९. पाटिपदेगन्तुकानं, एवमेव अयं नयो;

सावेय्य सुत्तं सञ्चिच्च, अस्सावेन्तस्स दुक्कटं.

४२०. सम्मज्जितुं पदीपेतुं, पञ्ञापेतुं दकासनं;

न करेय्य तथा कल्लो, महाथेरेन पेसितो.

४२१. सम्मज्जित्वा पदीपेत्वा, पट्ठपेत्वा दकासनं. गणञत्तिं ठपेत्वेवं, कत्तब्बो तीहुपोसथो. ‘‘सुणन्तु मे आयस्मन्ता, अज्जुपोसथो पन्नरसो, यदायस्मन्तानं पत्तकल्लं, मयं अञ्ञमञ्ञं पारिसुद्धिउपोसथं करेय्यामा’’ति.

४२२. एकंसं चीवरं कत्वा, निसीदित्वा उक्कुटिकं,. थेरेन अञ्जलिं तेवं, पग्गय्ह समुदीरिया. ‘‘परिसुद्धो अहं आवुसो, परिसुद्धोति मं धारेथा’’ति, वदे यावततीयकं.

४२३. समत्तपुब्बारम्भेन, ते नवेनेवमीरिया. ‘‘परिसुद्धो अहं भन्ते, परिसुद्धोति मं धारेथा’’ति, वदे यावततीयकं.

४२४. द्वीसु थेरेन कत्तब्बं, कत्वेवमीरियो नवो. ‘‘परिसुद्धो अहं आवुसो, परिसुद्धोति मं धारेही’’ति तिक्खत्तुं वत्तब्बो.

४२५. नवेन थेरो तिक्खत्तुं, एवमस्स उदीरियो;

‘‘परिसुद्धो अहं भन्ते, परिसुद्धोति मं धारेथा’’ति.

४२६. पुब्बकिच्चं समापेत्वा, अधिट्ठेय्येवमेकको. ‘‘अज्ज मे उपोसथो पन्नरसोति वा चातुद्दसोति वा अधिट्ठामी’’ति वत्तब्बं, नो चेधिट्ठेय्य दुक्कटं.

४२७. यत्थ वसन्ति चत्तारो, तयो वा यदि वा दुवे;

पारिसुद्धिं हरित्वान, एकेकस्सितरीतरे;

तं तं उपोसथं कयिरुं, सिया आपत्ति दुक्कटं.

४२८. वग्गे समग्गे वग्गोति, सञ्ञिनो विमतिस्स वा;

दुक्कटं करोतो भेदा-धिप्पायेन थुल्लच्चयं;

वग्गे समग्गेनापत्ति, समग्गो इति सञ्ञिनो.

४२९. उक्खित्तस्स गहट्ठस्स, सेसानं सहधम्मिनं;

पाराजिकस्साभब्बस्स, सिक्खानिक्खित्तकस्स च.

४३०. निसिन्नपरिसायञ्च, सभागापत्तिको तथा;

छन्देन परिवुत्थेन, पातिमोक्खं न उद्दिसे.

४३१. अदेसयित्वानापन्नं, नाविकत्वान वेमतिं;

नुपोसथेपि वा कातुं, पोसथो न च कप्पति.

४३२. अट्ठितोपोसथावासा, न वजे तदहू विना;

अन्तरायं व सङ्घं वा-धिट्ठातुं सीममेव वाति.