३९. वस्सूपनायिकनिद्देसो

वस्सूपनायिका चेवाति –

३०९. पुरिमिका पच्छिमिका, दुवे वस्सूपनायिका;

तत्थालयपरिग्गाहो, वचीभेदो च एदिसो.

३१०. ‘‘इमस्मिं विहारे इमं, तेमासं वस्सं उपेमि;

इध वस्सं उपेमी’’ति, चित्तुप्पादेत्थ आलयो.

३११. नोपेतुकामो आवासं, तदहूतिक्कमेय्य वा;

भवेय्य दुक्कटापत्ति, जानं वानुपगच्छतो.

३१२. दुतियं उपगच्छेय्य, छिन्नवस्सोनुपागतो;

न पक्कमेय्य तेमासं, अवसित्वान चारिकं.

३१३. मातापितूनमत्थाय, पञ्चन्नं सहधम्मिनं;

गिलानतदुपट्ठाक-भत्तमेसिस्समोसधं.

३१४. पुच्छिस्सामि उपट्ठिस्सं, गन्त्वानभिरतं अहं;

वूपकासिस्सं कुक्कुच्चं, दिट्ठिं गरुकमादिकं.

३१५. करिस्सं वापि कारेस्सं, विनोदनं विवेचनं;

वुट्ठानं वापि उस्सुक्कं, गन्तुमिच्चेवमादिना;

लब्भं सत्ताहकिच्चेन, पहितापहितेपि वा.

३१६. सङ्घकम्मे वजे धम्म-स्सवनत्थं निमन्तितो;

गरूहि पहितो वापि, गरूनं वापि पस्सितुं.

३१७. न भण्डधोवनुद्देस-ञातुपट्ठाकदस्सने;

लब्भं न पापुणेय्यज्जे-वागमिस्सन्तुदूरगो.

३१८. सेसञातीहि पहिते, भिक्खुनिस्सितकेन च;

उपासकोपासिकाहि, निद्दिसित्वाव पेसिते.

३१९. वस्सच्छेदे अनापत्ति, अन्तराये सतत्तनो;

सङ्घसामग्गिया वा नो, छिन्नवस्सो पवारये.

३२०. अज्झोकासे च रुक्खस्स, सुसिरे विटपेपि वा;

छवकुटिछत्तचाटी-सूपगन्तुं न वट्टति.

३२१. असेनासनिकेनापि, उपगन्तुं न लब्भति;

पवारेतुञ्च लब्भति, नावासत्थवजूपगोति.