२५. अकप्पियसयननिद्देसो

अकप्पियसयनानीति –

१८७. आसन्दी तूली पल्लङ्को, पटिकं गोनचित्तकं;

पटली विकती उद्द-लोमी एकन्तलोमिका.

१८८. कुत्तं कोसेय्यं कट्टिस्सं, हत्थिअस्सरथत्थरा;

जिनप्पवेणिकदली-मिगप्पवरअत्थरा.

१८९. सलोहितवितानञ्चु-भतोरत्तूपधानकं;

अकप्पियानि एतानि, दुक्कटं परिभुञ्जतो.

१९०. आसन्दादित्तया सेसे, लब्भते गिहिसन्तके;

धम्मासने च भत्तग्गे, घरे चापि निसीदितुं;

भूमत्थरणसङ्खेपे, सयितुञ्चापि कप्पति.

१९१. चतुरंसपीठा सत्तङ्गा, पञ्चङ्गा उच्चपादका;

तूलोनद्धा घरेयेव, मञ्चपीठा निसीदितुं.

१९२. चोळवाकुण्णपण्णानं, तिणानञ्चेव पूरिता;

चीवरच्छवियो पञ्च, भिसी सब्बत्थ कप्पिया.

१९३. तूलत्तयं भिसिगब्भो, लोमानि मिगपक्खिनं;

बिम्बोहने अनुञ्ञातं, तूलवज्जा मसूरके.

१९४. मनुस्सलोममुण्णायं, पण्णे पुप्फं तमालकं;

सुद्धं न आसनञ्चेव, लब्भमप्पटिवेक्खितन्ति.