२. सङ्घादिसेसनिद्देसो

गरुका नवाति –

१९. मोचेतुकामता सुक्क-स्सुपक्कम्म विमोचयं;

अञ्ञत्र सुपिनन्तेन, समणो गरुकं फुसे.

२०. इत्थिसञ्ञी मनुस्सित्थिं, कायसंसग्गरागवा;

सम्फुसन्तो उपक्कम्म, समणो गरुकं फुसे.

२१. तथा सुणन्तिं विञ्ञुञ्च, मग्गं वारब्भ मेथुनं;

दुट्ठुल्लवाचारागेन, ओभासेत्वा गरुं फुसे.

२२. वत्वात्तकामुपट्ठान-वण्णं मेथुनरागिनो;

वाचा मेथुनयुत्तेन, गरुं मेथुनयाचने.

२३. पटिग्गहेत्वा सन्देसं, इत्थिया पुरिसस्स वा;

वीमंसित्वा हरं पच्चा, समणो गरुकं फुसे.

२४. संयाचितपरिक्खारं, कत्वादेसितवत्थुकं;

कुटिं पमाणातिक्कन्तं, अत्तुद्देसं गरुं फुसे.

२५. महल्लकं विहारं वा, कत्वादेसितवत्थुकं;

अत्तनो वसनत्थाय, समणो गरुकं फुसे.

२६. अमूलकेन चोदेन्तो, चोदापेन्तोव वत्थुना;

अन्तिमेन च चावेतुं, सुणमानं गरुं फुसे.

२७. अञ्ञस्स किरियं दिस्वा, तेन लेसेन चोदयं;

वत्थुना अन्तिमेनाञ्ञं, चावेतुं गरुकं फुसे.

२८. छादेति जानमापन्नं, परिवसेय्य तावता;

चरेय्य सङ्घे मानत्तं, परिवुत्थो छ रत्तियो.

चिण्णमानत्तमब्भेय्य, तं सङ्घो वीसतीगणो.

२९. आपत्तिनुक्खित्तमनन्तराय

पहुत्ततायो तथसञ्ञिता च;

छादेतुकामो अथ छादनाति,

छन्ना दसङ्गेह्यरुणुग्गमम्हीति.