५. तलसत्तिकसिक्खापदवण्णना

तलमेव तलसत्तिकं. ‘‘पोथनसमत्थट्ठेन सत्तिक’’न्ति एके. यस्मा पहरितुकामताय पहरतो पुरिमेन पाचित्तियं, केवलं उच्चारेतुकामताय उग्गिरणमत्ते कते इमिना पाचित्तियं. इमिना पन विरज्झित्वा पहारो दिन्नो, तस्मा नपहरितुकामताय दिन्नत्ता दुक्कटं. किमिदं दुक्कटं पहारपच्चया, उदाहु उग्गिरणपच्चयाति? पहारपच्चया एव दुक्कटं, पुरिमं उग्गिरणपच्चया पाचित्तियन्ति सदुक्कटं पाचित्तियं युज्जति. पुरिमञ्हि उग्गिरणं, पच्छा पहारो. न च पच्छिमं पहारं निस्साय पुरिमं उग्गिरणं अनापत्तिवत्थुकं भवितुमरहतीति नो तक्कोति (वजिर. टी. पाचित्तिय ४५६) आचरियो.

तलसत्तिकसिक्खापदवण्णना निट्ठिता.