२. सुद्धकाळकसिक्खापदवण्णना

काळकानन्ति सभावेन वा रजनेन वा काळकानं. यथाह ‘‘काळकं नाम द्वे काळकानि जातिया काळकं वा रजनकाळकं वा’’ति. अञ्ञेहि अमिस्सितानन्ति अञ्ञेहि अमिस्सितकाळकानन्ति अत्थो. ‘‘यथा पठमे ‘एकेनापि कोसियंसुना’ति (कङ्खा. अट्ठ. कोसियसिक्खापदवण्णना) वुत्तं, तथा इधापि ‘एकेनापि अञ्ञेन अमिस्सेत्वा’ति अवुत्तत्ता अञ्ञेन पन मिस्सकभोगेपि अपञ्ञायमानरूपकं चे ‘सुद्धकाळक’मिच्चेव वुच्चती’’ति (वजिर. टी. पाराजिक ५४७) वदन्ति.

एत्थ च ‘‘इदं मे, भन्ते, सुद्धकाळकानं एळकलोमानं सन्थत’’न्तिआदिना (पारा. ५४९) निस्सज्जनविधानं वेदितब्बं. सेसन्ति पुब्बपयोगदुक्कटचतुक्कपाचित्तियादिकं. अङ्गेसु पन ‘‘सुद्धकाळकभावो’’ति अयं विसेसो.

सुद्धकाळकसिक्खापदवण्णना निट्ठिता.