१०. अननुञ्ञातसिक्खापदवण्णना

तेसं अत्थिभावं अजानन्तियाति (पाचि. अट्ठ. ११६३) तेसं मातादीनं अत्थिभावं अजानन्तिया. अननुञ्ञातसमुट्ठानन्ति यं वाचतो, कायवाचतो, वाचाचित्ततो, कायवाचाचित्ततो च समुट्ठाति, तं अननुञ्ञातसमुट्ठानं. कथं? अब्भानकम्मादीसु केनचिदेव करणीयेन खण्डसीमायं निसिन्ना ‘‘पक्कोसथ सिक्खमानं, इधेव नं उपसम्पादेस्सामा’’ति उपसम्पादेति, एवं वाचतो समुट्ठाति. ‘‘उपस्सयतो उट्ठाय उपसम्पादेस्सामी’’ति वत्वा खण्डसीमं गच्छन्तिया कायवाचतो समुट्ठाति. द्वीसु ठानेसु पण्णत्तिं जानित्वा वीतिक्कमं करोन्तिया वाचाचित्ततो, कायवाचाचित्ततो च समुट्ठाति. अननुजानापेत्वा उपसम्पादनतो किरियाकिरियं.

अननुञ्ञातसिक्खापदवण्णना निट्ठिता.