८. कुमारिभूतवग्गो

१-५. पठमकुमारिभूतादिसिक्खापदवण्णना

सब्बपठमा द्वे महासिक्खमानाति गब्भिनिवग्गे वुत्ता द्वे सिक्खमाना. ‘‘सिक्खमाना’’इच्चेव वत्तब्बाति सम्मुतिकम्मादीसु एवं वत्तब्बा. ‘‘गिहिगता’’ति वा ‘‘कुमारिभूता’’ति वा न वत्तब्बाति सचे वदन्ति, कम्मं कुप्पतीति अधिप्पायो.

चतुत्थपञ्चमानि उत्तानत्थानेव.

पठमकुमारिभूतादिसिक्खापदवण्णना निट्ठिता.

६-८. खीयनधम्मादिसिक्खापदवण्णना

वुट्ठापनसम्मुतिया याचितायाति उपसम्पदासम्मुतिया याचिताय.

सत्तमट्ठमानि उत्तानत्थानेव.

खीयनधम्मादिसिक्खापदवण्णना निट्ठिता.

९. सोकावाससिक्खापदवण्णना

आगच्छमानाति आगच्छन्ती.

सोकावाससिक्खापदवण्णना निट्ठिता.

१०. अननुञ्ञातसिक्खापदवण्णना

तेसं अत्थिभावं अजानन्तियाति (पाचि. अट्ठ. ११६३) तेसं मातादीनं अत्थिभावं अजानन्तिया. अननुञ्ञातसमुट्ठानन्ति यं वाचतो, कायवाचतो, वाचाचित्ततो, कायवाचाचित्ततो च समुट्ठाति, तं अननुञ्ञातसमुट्ठानं. कथं? अब्भानकम्मादीसु केनचिदेव करणीयेन खण्डसीमायं निसिन्ना ‘‘पक्कोसथ सिक्खमानं, इधेव नं उपसम्पादेस्सामा’’ति उपसम्पादेति, एवं वाचतो समुट्ठाति. ‘‘उपस्सयतो उट्ठाय उपसम्पादेस्सामी’’ति वत्वा खण्डसीमं गच्छन्तिया कायवाचतो समुट्ठाति. द्वीसु ठानेसु पण्णत्तिं जानित्वा वीतिक्कमं करोन्तिया वाचाचित्ततो, कायवाचाचित्ततो च समुट्ठाति. अननुजानापेत्वा उपसम्पादनतो किरियाकिरियं.

अननुञ्ञातसिक्खापदवण्णना निट्ठिता.

११. पारिवासिकसिक्खापदवण्णना

दारुणन्ति पापं. पतिमानेन्तन्ति ओलोकेन्तं.

पारिवासिकसिक्खापदवण्णना निट्ठिता.

१२. अनुवस्ससिक्खापदवण्णना

एकन्तरिकन्ति एकेन वस्सेन अन्तरिकं कत्वा.

अनुवस्ससिक्खापदवण्णना निट्ठिता.

१३. एकवस्ससिक्खापदवण्णना

मातिकायं एकं वस्सं द्वेति एकन्तरिके एकेकस्मिं संवच्छरे द्वे. एकन्तरिकं वुट्ठापेन्तियाति इमस्मिं वस्से एकं, पुन एकन्तरिकं एकन्ति द्वे वुट्ठापेन्तिया अनापत्ति.

एकवस्ससिक्खापदवण्णना निट्ठिता.

कुमारिभूतवग्गो अट्ठमो.