७. गब्भिनीवग्गो

१-२. गब्भिनीआदिसिक्खापदवण्णना

पठमं उत्तानत्थमेव.

थने भवं थञ्ञं, खीरं. यं पायेतीति यं दारकं पायेति.

गब्भिनीआदिसिक्खापदवण्णना निट्ठिता.

३. पठमसिक्खमानसिक्खापदवण्णना

पदभाजने वुत्तनयेनाति ‘‘पाणातिपाता वेरमणिं द्वे वस्सानि अवीतिक्कम्म समादानं समादियामि…पे… विकालभोजना वेरमणिं द्वे वस्सानि अवीतिक्कम्म समादानं समादियामी’’ति (पाचि. १०७९) पदभाजनसमीपे अट्ठुप्पत्तियं वुत्तनयेन. इमा पन छ सिक्खायो सट्ठिवस्सायपि पब्बजिताय दातब्बायेव, न एतासु असिक्खिता उपसम्पादेतब्बा.

पठमसिक्खमानसिक्खापदवण्णना निट्ठिता.

४-५. दुतियसिक्खमानादिसिक्खापदवण्णना

पदभाजने वुत्ता उपसम्पदासम्मुति न दिन्ना होतीति पदभाजनसमीपे अट्ठुप्पत्तियं वुत्ता उपसम्पदासम्मुति ञत्तिदुतियाय कम्मवाचाय न दिन्ना होति.

पञ्चमं उत्तानत्थमेव.

दुतियसिक्खमानादिसिक्खापदवण्णना निट्ठिता.

६-१०. दुतियगिहिगतादिसिक्खापदवण्णना

दसवस्साय गिहिगताय सिक्खासम्मुतिं दत्वा परिपुण्णद्वादसवस्सं उपसम्पादेतुं वट्टति.

सत्तमअट्ठमनवमदसमानि उत्तानत्थानेव.

दुतियगिहिगतादिसिक्खापदवण्णना निट्ठिता.

गब्भिनीवग्गो सत्तमो.