६. आरामवग्गो

१-२. आरामपविसनादिसिक्खापदवण्णना

सीसानुलोकिकायाति सीसं अनुलोकेन्तिया. यत्थ वा भिक्खुनियो सन्निपतिताति यत्थ भिक्खुनियो पठमतरं सज्झायनचेतियवन्दनादिअत्थं सन्निपतिता. आपदासूति केनचि उपद्दुता होति, एवरूपासु आपदासु पविसितुं वट्टति.

दुतियं उत्तानत्थमेव.

आरामपविसनादिसिक्खापदवण्णना निट्ठिता.

३-४. गणपरिभासनादिसिक्खापदवण्णना

सेसन्ति ‘‘अत्थधम्मअनुसासनिपुरेक्खाराया’’तिआदिकं अवसेसं. तत्थ अनुसासनिपुरेक्खारायाति ‘‘इदानिपि त्वं बाला अब्यत्ता’’तिआदिना (पाचि. अट्ठ. १०३६) नयेन अनुसासनिपक्खे ठत्वा वदन्तिया अनापत्ति.

चतुत्थं उत्तानत्थमेव.

गणपरिभासनादिसिक्खापदवण्णना निट्ठिता.

५. कुलमच्छरिनीसिक्खापदवण्णना

कुले मच्छरो कुलमच्छरोति पुरिमस्मिं पक्खे सकत्थे इनीपच्चयो, तं कुलं अस्सद्धं अप्पसन्नन्ति कुलस्स अगुणं, अयसं वा भासन्तियाति अत्थो. भिक्खुनीनं अवण्णं भासन्तियाति ‘‘भिक्खुनियो दुस्सीला पापधम्मा’’ति (पाचि. अट्ठ. १०४३) भिक्खुनीनं अगुणं, अयसं वा भासन्तिया.

सन्तंयेव आदीनवन्ति कुलस्स वा भिक्खुनीनं वा सन्तंयेव अगुणं.

कुलमच्छरिनीसिक्खापदवण्णना निट्ठिता.

६-८. अभिक्खुकावासादिसिक्खापदवण्णना

समन्तपासादिकायं वुत्तोति समन्तपासादिकाय ओवादवग्गस्स पठमसिक्खापदे (पाचि. अट्ठ. १४४) वुत्तो.

सत्तमट्ठमानि उत्तानत्थानेव.

अभिक्खुकावासादिसिक्खापदवण्णना निट्ठिता.

९-१०. ओवादूपसङ्कमनादिसिक्खापदवण्णना

उपोसथस्स पुच्छनं उपोसथपुच्छा, सावकपच्चयं, रस्सत्तञ्च कत्वा ‘‘उपोसथपुच्छक’’न्ति वुत्ताति आह ‘‘उपोसथपुच्छन’’न्ति. ओवादत्थायाति ओवादयाचनत्थाय.

दसमं उत्तानत्थमेव.

ओवादूपसङ्कमनादिसिक्खापदवण्णना निट्ठिता.

आरामवग्गो छट्ठो.