९. दुतियउच्चारछड्डनसिक्खापदवण्णना

भिक्खुनियापीति पि-सद्देन भिक्खुं समुच्चिनोति. अनिक्खित्तबीजेसु (पाचि. अट्ठ. ८३०) पन खेत्तेसु कोणादीसु वा असञ्जातरोपिमेसु खेत्तमरियादादीसु वा छड्डेतुं वट्टति. मनुस्सानं कचवरछड्डनट्ठानेपि वट्टतियेव. छड्डितखेत्तेति मनुस्सेसु सस्सं उद्धरित्वा गतेसु छड्डितखेत्तं नाम होति, तत्थ वट्टति. यत्थ पन ‘‘लायितम्पि पुब्बण्णादि पुन उट्ठहिस्सती’’ति रक्खन्ति, तत्थ यथावत्थुकमेव. सामिके अपलोकेत्वाति एत्थ खेत्तपालका, आरामादिगोपका च सामिकाव. इमिना च सङ्घसन्तके भिक्खुस्स छड्डेतुं वट्टति सङ्घपरियापन्नत्ता, न भिक्खुनीनं. भिक्खुनीनं पन अत्तनो सन्तके भिक्खुसन्तके वुत्तनयेनेव वट्टतीति दस्सेति, एवं सन्तेपि सारुप्पवसेन कातब्बं.

दुतियउच्चारछड्डनसिक्खापदवण्णना निट्ठिता.