५. मञ्चपीठसिक्खापदवण्णना

पञ्चमे मञ्चन्ति मसारकादीसु अञ्ञतरं. पीठम्पि तादिसमेव, तं पन मञ्चो विय अतिदीघं, आसन्दिको विय च समं चतुरस्सं न होति. छेदनकं भेदनकसदिसमेव.

सावत्थियं उपनन्दं आरब्भ उच्चे मञ्चे सयनवत्थुस्मिं पञ्ञत्तं, पमाणिकं करोन्तस्स, पमाणातिक्कन्तं लभित्वा छिन्दित्वा यथा पमाणमेव उपरि दिस्सति, एवं निखणित्वा वा, उत्तानं वा कत्वा, अट्टकं वा बन्धित्वा परिभुञ्जन्तस्स, उम्मत्तकादीनञ्च अनापत्ति. पमाणातिक्कन्तमञ्चपीठता, अत्तनो अत्थाय करणं वा कारापेत्वा वा पटिलाभोति इमानेत्थ द्वे अङ्गानि. सेसं सब्बं सूचिघरसिक्खापदसदिसमेवाति.

मञ्चपीठसिक्खापदवण्णना निट्ठिता.